Угурчанаькъан Шовхала Азмат-Гири ваь хиннав  1945 шера  тов бетта 26 дийнахьа Казахстана Акмолински областе. ДукхагIа из сона дагавар дувзаденна да «Сердало» газета редакцеца. ЛагIа тIехьа лагIа доаккхаш, эггара лохерча балхагара хьалволавенна, кертерча редактора заместителга кхаччалца бола никъ бир Азмат-Гире. Юххьанца  корректоралла хьаийцавар из. Тхо чухиннар Шолжа-ГIалий тIара «Кепайоазон цIа» оалаш йола, ийсазза вIаштIаръяь гIишло яр. Из яр В. Маяковске урам тIа. ГIалгIай газета редакци цу цIен ялхлагIча этажа тIа яр, корректораш редакце багIацар, уж багIа моттиг лохерча гIата тIа типографе яр. Цо а цунцарча новкъосташа а гIалатех цIендора кхоана цIенача, кIайча каьхата тIа арадаьнна, нахага кхача дезаш дола къаман газет. Редакце кхоллама балхлочун (корреспондента) моттиг мукъаяллалца цига болх беш хилар Угурчанаькъан Азмат-Гири. Из цIена, дега тоам беш бола болх ба ала хала дар. Даим Iаьржача басараша даьха хулар корректорий кулгаш, басарий а даша а хьаж йоагIаш яр газет хьадеш йола машинаш, газет вIашагIдоллаш дола истолаш чулатта фусам. Цох хоттаенна яр гIалаташ тоадераш багIа моттиг а. Дикка ха яьккхар вай мехкахочо из болх беш. Цул тIехьагIа, керттера редактор хиннача Тебой Тухана редакце хьалчувоалавир из. Цун юртхочо Къоастой Башира (уж шаккхе Эккажкъонгий-Юртара вар) кулгал деш яр промышленностеи транспортеи отдел. Цу чу корреспондента болх белар цунна. Бакъда отдела кулгалхо пенсе вахача,  цун гIанд кхаьчар цунга. Хетаргахьа, балхара ше дIавоалача хана,  шийна когаметта оттаве могаваь хила тарлуш а вар из, хIана аьлча цунна мо из болх ховш саг кхы вацар редакце. Азмат-Гири, мел доккха гIулакх шийга кхачарах, кура-сонта варгволчарех вацар. Отдела кулгал деш дикка ха яьккхача, редакце къаьнагIболча болхлоех цаI хул цох. Шолжа-ГIалий тIа хиннача журналистех, из болх кIоарггачара ховча нахах наггахьа саг мара висавацар. Цудухьа Угурчанаькъанчоа тIадулл бехктокхаме гIулакх, цох газета керттерча редактора заместитель ву. ДукхагIа цо деша дезаш хиннараш дар гIалгIай меттала даь йоазош. Цу балха тIа волаш, дикка ха яьккхар цо. Вешта аьлча, лохера хьалволавенна, редакце мел дола балхаш даь саг вар из. Духхьал кертерча редактора болх бисар цо ца беш, хIана аьлча могаш воацаш ха яьккхачул тIехьагIа, журналист къаьстар вайцара.

Духхьал публицистика язъяь ца Iеш, из вар поэт а. Шовхала Азмат-Гири вар Россе йоазонхой Союза а журналистий Союза а доакъашхо, ГIалгIай Республикан культуран сийдола болхло, цунна еннаяр «КарагIдаьннарех» яха орден.

Кхелхав Шовхала Азмат-Гири 2011 шера.