Кицаш
Саг болатал чIоагIагIа вале а, зизал бочагIа ва.
Иман дар ва ираз дар.
Визза къонах овлияэл лакхагIа лаьрхIав Дала.
Везачоа далар а ийшадац, цавезачох алар а ийшадац.
Гаьнашта лакхе «шорх» латт, гаьнашта лохе тем латт.
Дувцар
Сеткъаргаш
Бийса я. Ши сеткъарг ягIа моажолга тIа, сигала урагI а хьежаш: дади-сеткъарги виIий-воI-сеткъарги. Еррига сигале хьалйиза цIераш я сигала къегаш.
– Дади, – йоах виIий-воIа-сеткъарго, – ма дуккха сеткъаргаш гулъеннай тховсара сигала!
– Сеткъаргаш яц уж, седкъий да, – йоах даде. – ЦIераш я уж сигала йоага. Царех цIи Iоежача, укхаза, лаьтта, хьахул керда сеткъарг.
Цу хана сигалара седкъа Iобежар.
– Дади, дади, – кхайк виIий-воI-сеткъарг, – бIаргабайрий хьона Iобежа седкъа?
– ХIанз керда сеткъарг хьахилар вай баь тIа, – йоах даде-сеткъарго.