Гаьнарча шахьарера цIавоагIача дас цIе бургац ера Iисайна. Дукха ха яр Iийсас боал санна цIе бургац еза сона яха, бакъда цIаста санна цIеяр кораягIацар, хIаьта Iийса ишттача бургаца мара раьза вацар. Да коа хьачувоаллашехь, Iоведар цIен тIехьашка удаш лийнна Iийса. Из хьатIакхачалехь, тIорме чура хьал а яьккха, цунна духьала хьалхийцар дас цо йийха боал мо цIе бургац. 

- Хьамза-а-а, ва Хьамза-а-а, дадас сона боал мо йола бургац енай, - яхаш, цIогIа деттар цо зIамагIа волча вешийга, кхаъ боахаш. Сов чIоагIа гIадваха, даь фоартах Iооллавелар из. Бургац бера Iо ца юллаш лелаш, сайранга вахар Iийса. Ловзий вай, аьнна, Хьамзас дехар дича а, а, йохаргья ер ловзе, яхаш, бера бургац Iо ца хецаш, лийлар из. Боад къовлабелар. Берригаш пхьор даа гулбелча, Iийса цхьаннахьара коравоагIаш вацар. ЦIагIа мел вола саг араваьлар из лаха, бакъда Iийса мичав ховш саг вацар. Юххера, цIагIа хьачуена, маьнгена кIалха дIачухьежар нана. МархIайоаллаш бургац йолаш, миIинге дIачутеIа, чIоагIвенна, наб еш уллар Iийса. Сомаваьккха, хьаараваьккхар цар кIаьнк. 

- Iийса, хье тхьовсаш хилча, из бургац мархIаелла сенна вижав хьо? - хаьттар дас.

Корта Iочубелла. 

- МархIара Iойиллача, бIехлургьяр из, - аьнна, йистхилар Iийса. Берригаш дIабелабелар, хIаьта Iийса, вийлха, араведар цIагIара.