Кицаш
Саг болатал чIоагIагIа вале а, зизал бочагIа ва.
Иман дар ва ираз дар.
Визза къонах овлияэл лакхагIа лаьрхIав Дала.
Везачоа далар а ийшадац, цавезачох алар а ийшадац.
Гаьнашта лакхе «шорх» латт, гаьнашта лохе тем латт.
Дувцар
Зе кIезигагIа хургда...
Шин тайпара Iажаш бохкаш лаьттав Яни. Царех цаIаш боккха, цIе басилгаш йолаш, хоза хиннаб. Вожаш зIамига хиннаб. Наха дукхагIа дIаийбеш хиннаб боккхагIбараш, зIамагIчаргахьа дIахьожаш хиннабац. Из новкъа долаш, Iажаш маьхал ца боалаш латтача кIаьнка уйла яьй, фу дича дIабаргбар-те зIамагIбараш, аьнна.
АргIанара эцархо тIаенай. Йоккха саг боккхагIчарга хьежа йолаелча, Яне аьннад:
- ЗIамагIбараш эца йоккха саг, зIамагIбараш. Уж дикагIа ба хьона!
- ХIанаб уж дикагIа? Сона-м боккхагIбараш хозагIа ма хетий.
- Бераша царг теха Iокхессача, зе кIезигагIа хургда хьона, - яьхад Яне.