Кицаш
Саг болатал чIоагIагIа вале а, зизал бочагIа ва.
Иман дар ва ираз дар.
Визза къонах овлияэл лакхагIа лаьрхIав Дала.
Везачоа далар а ийшадац, цавезачох алар а ийшадац.
Гаьнашта лакхе «шорх» латт, гаьнашта лохе тем латт.
Дувцар
«ЮхавоагIаш Iоваргва хьо...»
Автобуса чу вагIача воккхача сага аьннад:
- КIаьнк, юртара аравоалача соцаяйталахь машин.
- Сагот ма де Iа, воти, парагIата вагIалахь. Соцаяйтаргья хьона...
Цхьа ха яьлча, хаьттад къоаночо:
- ДIакхаьчадий вай юрта йисте?
- Э-э, воти, вицвеннавар со. Дукха ха я вай юртара арадаьнна. ЮхавоагIаш Iоваргва хьо, - яьхад Яне.