Дукха гайна хьаенай Ине цIаваха веза, юрта йода автобус. Нах уж мо йола кхо машин хьалйиззал дукха хиннаб. ХIаравар ше-ше хьалхагIа тIаха гIерташ хиннав, юккъе гIолла текхадеш хьонка тIормеш, новраш, коартолий сеткаш долаш. Цхьавар, дохар кхераш, геттара айдаь фуий латок дахьаш воагIаш хиннав. Автобус хьалйизай, кий Iойожа, ког Iооттабе моттиг йоацаш. Арахьа латтараш дукхагIа хиннаб чухьарбарел. КорзагIваьнна хьувзаш водитель а хиннав, цар хьалу ахча карардалар кхераш:

- ХьалгIо  магIахьа, фуд оаш леладер? ТIехьашкара яьсса ма йий ер. Шо санна цIабаха безаш ба шоана уж нах! Хьаеллал царна тIехьашкара ниI!

Ини а хиннав, сатем байна хьувзаш. Арахьа бисарашта юкъе лаьттав из. Ше цIа ца водаш висар кхераш, йийллача автобуса чу хьалчукхайкав кIаьнк:

- ХьалтаIа яьй! Оаш курткаш Iойоахаре, дерригаш цIадохалургдар-кх вай.