Кицаш
Саг болатал чIоагIагIа вале а, зизал бочагIа ва.
Иман дар ва ираз дар.
Визза къонах овлияэл лакхагIа лаьрхIав Дала.
Везачоа далар а ийшадац, цавезачох алар а ийшадац.
Гаьнашта лакхе «шорх» латт, гаьнашта лохе тем латт.
Дувцар
«...Сога-м дац»
Захалашка хьоашалгӏа а хинна, цӏаводаш хиннав Яни. Зӏамига вале а, цох бехке хьаьша хеташ, из накъаваккха арабаьннаб истий а, мехкарий а, кагий нах а. Коарча фусама-нанас, геттара хьаьша везваь, ӏимерзача оазаца аьннад:
- Яни, каст-каста юхавоагӏаш хила, эхь ца хеташ. ЦIакхаьчача наьнага салам-моаршал дӏалелахь.
Парт, аьнна, хьахьежача Яне:
- Мичад из, сога-м дац?! - аьннад, ший хаче кисашта кулгаш ӏотIа а тохаш.