Дади-нани баьхаб миска; 

Дайна сиргӀилг, боргӀал, циск.

Етташ йорт, йоахаш лар, 

Лийхар лаьтта дилцца гӀор.

- Кхы арабоаккхаргбац аз ког! – 

Аьлар даде, дилла дог. – 

Ӏодотта, йоккха саг, вайна чай, 

Рузкъа хиннадац царца вай!

Ӏаьхача боргӀал, наьха циск,

Нани аралелхар, миска.

Уж доацилга хайча ший, 

БӀаргаш лешаш, дувлар хий.

Къайленашка хьежа нах

Биа баьлар сиргӀилга мах. 

Дехкаш дол, хехкаш поал,

СагӀийна хӀама лелаш, оал.

- Циск дӀадахар диканна дац, 

СиргӀилг, боргӀилг-м хӀама дергдац.

Нани, бехк ма баккхалаш сох, 

Хьарам хӀама даьллад шух!

Хьарам хӀама хьокха ца деннилга, 

Тешаш яр нани-миска.

ЦӀенгахьа дерза маьрша доацаш, 

Лелар сиргӀилг, боргӀилг, циск.

Къа ца хьийгача пайда хилац,

Маза бувзаш йоаллар гизг.

Ча а йоаллар, боангаш кийчъеш; 

Лаца сиргӀилг, боргӀилг, циск.

Ча, борз, чхьагӀалкх дар-кха даим,

Аькхе ухаш, цхьана Ӏеш. 

Барт болча, аьттув хул-кх, 

Оакхарий дар из кхетадеш.

ЧхьагӀалкх массаза санна цӀувзар,

Борз беттага увгӀаш яр.

Дахчан маьнге тӀа хаьнаръяьнна, 

Ча, салоӀаш, уллаш яр.

Чано йоах: 

- Со мецъеннай, 

Тховсара хургда вайна той; 

Йолле, чхьагӀалкх, дӀа а яхе, 

Хьабеха вай лоалахой!

ЧхьагӀалкх йода, цӀог Ӏохийца, 

Лаьттах Ӏохьекхалу бат, 

Йода чхьагӀалкх, чоабол ийца, 

ТӀолх мо Ӏоулл, ювхьаш, мотт.

- Ва, сиргӀилг, цӀагӀа йий хьо?! -

ДӀачудетт чхьагӀалкхо цӀогӀа. - 

БоргӀал, циск уллув долаш, 

Хьога чано хьакхача йоах!

- Сийсара йийнаяр оаха чхьагӀалкх, 

Къаьна хиннад из цун дулх, 

Кхехкадича, хьа ца доалаш, 

Тхона хиннаб тийшаболх!

Ӏимад яьлар: 

- ЧхьагӀалкх юъ оаш?!

- Цул чам болашагӀа хӀама дий?

Чана, берза ма дарра хайча, 

Мохкадергдар цар хьа цӀий!

Наькъа ена кӀаьд а енна,

Меца хургба из хьа кер, 

ХьачуйоагӀе, дакъа дергда, 

Тхоца дуаргда Ӏа пхьор.

Едар чхьагӀалкх, цӀог чуделла, 

Лаьттах Ӏо ца кхеташ ког, 

Йодар чхьагӀалкх, унзаръяьнна, 

Эккха санна детталора дог.

ЧхьагӀалкх ча йолча юхакхаьчар, 

Дакъан санна бар цун бос, 

Кегабенна бар цун лоткъам, 

ЦӀагаргаш мо гӀетта мос.

- Лоалахой ба вай чӀоагӀа бирса, 

Цар хьадийцар юхадувца хац!

Чано аьлар, раьза йоацаш:

- Хьол эсалагӀа аькха дац!

Тийшача балха туп ма я хьо, 

Цига Ӏа дийцар хьанна хов? 

Ча, борз хьайна уллув хилча, 

Майра я хьо, доах Ӏа дов.

Денал долаш я хьо, буозий, 

Турпал я хьо, когашта мей.

СиргӀилг йоалаеш, чехка йола, 

Боанг йогӀаргья царна вай.

Борз дӀаийккхар сиргӀилг йоалае, 

Йорт йихьар, сеттадеш гош, 

Дика ховш яр борз къоал де, 

СиргӀилг яа яр из ловш.

Ча я чӀоагӀа шо дукха дезаш;

Кийчдаь ягӀа шоана той, 

Фу деш дагӀа шо, хьа ца доагӀаш? 

Иштта хулий лоалахой?! 

- Борз йийнаяр сийсара оаха, 

Къаьна хиннад цун дулх.

Берза цӀока талхаргйоацаш, 

Цици, ӀотӀахьарцал тух.

Наькъах ена кӀаьд а енна, 

Меца хургба из хьа кер, 

ХьачуйоагӀе, дакъа дергда, 

Тхоца дуаргда Ӏа пхьор.

- Бертий юъ оаш?! - ийккхар берзага. 

- Цул чам болашагӀа хӀама дий? 

Цигара берзо йоарт йихьар, 

Ӏочуделла цӀог а ший.

Берзо, йодаш, уйла йора; 

Дайна даьннад, яхаш, сий.

Из шийх елаш санна хетар, 

Наькъа йоагӀаш кхийттай зӀий.

БусӀехарго, тӀехьакхайкаш: 

- Фу хилар хьона, - йоахар, - борз? 

Из ча йолча юхакхаьчар, 

Никъ а лоацагӀа хеташ кхозза.

Берзо аьлар: 

- Бехк ма баккха, 

КъинтӀераяла сона, ча!

Дукха биаб вай цхьана кхача, 

Говраш, доахан диад, жа...

СирӀилга муӀаш - шалташ санна, 

Циска мӀараш - урсаш мо, 

БоргӀилг - аьрзи санна майра, 

Дала долда вайна гӀо!

Хала йоагӀа со кӀалхаръяьнна, 

Ӏо ца кхеташ лаьттах ког, 

Уж мо лоалахой хилар - бала, 

Царна бертий йоае мог!

ЧхьагӀалкх елар, аркъалъухаш, 

Берзах хеташ яцар дош. 

Ча, борз яцар белам безаш, 

ЦIур болла яр дика ховш.

ЧӀоагӀа берза раьза йоацаш, 

Ше уллачара ча хьалгӀотт: 

- Аз дергда царна доагӀар, 

Дуне дергда царна готта!

Вахар хилац, бала боацаш, 

Седкъий бист лаьтта кхоач.

Лоалахошта раьза йоацаш, 

Хичолаш еш, ча дӀакхоач.

- Ва сиргӀилг! ЦӀагӀа йий хьо? -

Чано наӀарах детт ший тӀод.

- Бераш кхерадеш, фу леладу Ӏа?

- Жоп да сона, хьаараотта!

Фу хилар-хьогӀ шух, яхаш, 

Шуга хьийжа, бӀаргаш деннад кӀай! 

Фу деш дагӀа шо, хьа ца доагӀаш? 

Долхаш-доагӀаш хила деза вай.

- Ча, Ӏа тхох бехк ма баккха! 

КӀаьдденна, корта бӀагораух.

Ча йийнаяр сийсара оаха, 

Молха мо дарбанна да цун дулх.

ХьачуйоагӀе, дакъа дергда,

Тхоца дуаргда Ӏа пхьор.

Наькъа ена кӀаьд а енна, 

Меца хургба из хьа кер.

- Ча а юъ оаш?! - хаьттар чано. 

- Цул чам болашагӀа хӀама дий?

Ча дӀаийккхар, кхераенна, 

Корта Ӏочубелла ший.

Борз увгӀар, паькъарг цӀувзар, 

КӀалхаръяьннай хӀанзза ча!

Къар ца лучан баргба аьттув,

Бокъо яргья, халаш, цкъа!