Эггара хозагIа бола фаьлг зизаш дувцаш бар ба, из фаьлг ане бувцар зIамигача берашта. Уж гуллора, цунна го а бийя, бийса хьатIаеча. 

- Хьун юкъе дагIача цIагIа бахар барттайна дезал: даи, нанеи, ши йиIиги. Эггара хьалхагIа деллалуш дола зизаш гулдора йиIигаша нанна. Цунах доккха цIай хулар нанна. БIаьсти яларга хьежар йиIигаш. Доккха лоа дар дилла. Корах арахьежаш, ягIар йиIигаш. Акхар кора кIалха, зIамига саь кIориг яр Iехаш. Хетаргахьа, нана йоацаш йисачох тара яр из. ЙиIигаша даьга дIадийцар шоашта дайнар. Дас зIамигача цIалга чу хьачуйоалайир саь кIориг. Шура хьокхаш, боча лелабора цар зIамига сай. Цунах чIоагIа хоза сай хулаш, боагIар. БIаьсти гаргагIорташ йоагIар, кIайча ювргIан кIалха тхьайса улла Iалам бIаьстенга хьежаш дар...

- Ани, вайна безар зIамига сай, - аьлар ПаьтIамата.

- ДIахо хьадувца тхона царех фу хиннад.

ДIахо дувца йолаелар йоккха саг: 

- Цхьан баьдеча бийсан, Iеха болабелар зIамига сай. ЦIен-да аравала велча, наIар тIа латташ бертий яйра цунна. Саьна тIакхача сагота яр бертий. Сай чуболча корах, чуйоалаш яйра цхьа борз. ДIакхайда топ хьа а ийца, аратехар дас топ. Цунах даьннача татах кхераенна, дIалийлхар бертий. Сай болча чуяьннар, корах гIолла араийккха, яхар. Чов яь берзо техача царгаша, сай бижа уллар. БIаьсти йоаллаше а, човнах бийрзар сай. ХIанз цар из лорабора бус а дийнахьа а. Цхьан Iуйрийна зизаш лаха яхаяр йиIигаш. Царна тIехьабахар сай. ЙиIигашта яйра зизаш дола моттиг. Хозало ваццалца бIарахьежаргволаш, хьужгаш дайра царна. Лоа мо кIай дар уж. КIеззига ераш дIагаьнабаьлча, сийрда-сигала беса хьужгаш дайра акхарна. Ма чIоагIа гIадъяхаяр нана! 

ХьунагIа дIабаха сай хIара Iай, кIориг тIехьа йолаш, Iа даккха боагIар.