Лоаман босагIа Надж ягIар ше цхьаь. Цхьа ха яьлча, зийра цо, шийна гонахьа дукха керда хаьлгаш лаьттан кIалхара арадаьннилга. Ший хур даь, цу хаьлгашта новкъостал де эттар Надж, малх хьежача, ший ткъовронаш царна тIера дIахойоахаш, хаьлгашта дикагIа маьлха сердал дIакхоачаргйолаш, чIоагIа догIа делхача хáна, ший ткъоврош царна тIагIолла дIаухийташ, уж лорадеш, ший овлашца лаьтта кIалхара хий-тIунал кIезигагIа чуувзаш, хаьлгашта уж кхоачаргдолаш.

Бакъда, хаьлгаш кIеззига хьа а хинна, царех гаьнилгаш хьахилча, чIоагIа Нажá раьза доацаш, кура-сонта къамаьлаш де даьлар уж, Нажá сардамаш а доахаш.

– ХIанз укхунна-м мотта ма хургдий, ший гIо-новкъостал вайна чIоагIа эшаш санна. Даьра, эшац вайна-м цу мо долча гажалгара цхьаккха новкъостал! Вай воашош-м да моллагIчун гIо де таро йолаш.

– Ер гудар ецаре, вай гIулакх-м дуккха дикагIа ма хургдарий! 

– Дала ди тохалда цунна! 

– Юкъеда ахйоалийла из, ди кхийтта!

– ЦIи яйла цох!

Шоай сардамаш шоаех дахар галгех. Йокъал эттар. ЗIамигача, ховхача галгий овлашта маганзар лаьттагара тIунал хьаоза. Докъаделар уж. Юха а ше цхьаь йисар Надж, лоаман босагIа.