Кицаш
Сиха даха хий фордах кхийттадац.
Везар велча, велхар даьннад.
БоргIалах Iаха енна котам яьттIай.
Кхийрачох турпал хиннавац.
ЦIи ца йийзача, кIур ихабац.
Фаьлг
Хоза-моза
Ай, малав из, велхаш вагIар,
Миска-миска велхаш вагIар?
Из ба Моза, из ба Моза –
БIаргаш Iаьржа дола Моза,
Ткъамаш даьржа дола Моза.
Хоза, хоза бола Моза.
Даде аьннад цунга тахан,
Нане аьннад цунга тахан:
«Кийчъе шифон, кийчде даьри –
Хьо Гизгага бода маьре.
Геттара йIаьхий яхаш я из,
Ахча лоархIаш ягIаш я из.
КIувсаш-зипаш, даьтта-шекар,
Шедар да цун цIагIа, шедар!»
Белхаш-белхаш багIа Моза.
Цунна-м хетац вIалла хоза
Яькха бIаргаш дола Гизг,
Даьнна тIодаш дола Гизг,
Къаьна, букъ тIабаьнна Гизг!
КорзагIбаьннаб лоалахой,
Зоахалол…
Из иштта дой?!
Мане бIаргех хий Iоух:
- М-у-у-у!
Баскилг дагIа, гIайгIа еш,
Ший из чIондарг елхаеш.
Котамо а гIайгIа ю:
- Ко-ко-ко!
Говро аре кхайкаю
- И-го-го!
Чоапилг корта лаьца лел:
- Маьржа-яI хьо, Мозан кхел!
Гизг-м царгаш иръеш ягIа.
Гизг-м мазаш дувзаш ягIа.
Яькха бIаргаш лотаденна,
Къегаш да цун, товнаш санна.
Гизг-м чIоагIа мецъеннай,
Гизг-м чIоагIа бирсъеннай.
Моза баа
Кийча я из…
Са дуне,
Ма ийрча я из!
Ай, иппIали,
ХIанз фу дергда?
Гизго буге,
Моза лергба!
Ший мазашца
Ткъамаш дийхка,
Ший тIодашца
МархIабийхка,
Бокъабергба Гизго Моза –
Къона Моза, хоза Моза…
Царгаш оттаергья дег тIа…
Ай, иппIали,
ХIанз фу дергда?!
Хаьрцар вахар.
Баьлар ала…
Оарц дала!
Оарц дала!
Зунгат доагIа, Зунгат доагIа;
ЭгIазлонца сувсаш чIоагIа,
Юкъа диткъа дола Зунгат,
Белаж шера йола Зунгат;
Хоза Моза бахьан долаш,
Дала кийча дола Зунгат.
ДоагIа Зунгат, шалта яьккха;
ДоагIа, денал хьалхадаьккха:
- Ира я са шалта, ира!
Мичай Гизг – вошшийна вира!
Кхехкаш ба са дег чу ала!
ДIа ма лечкъа, гучаяла!
БIаргаш Iаьржа дола Моза,
Ткъамаш даьржа дола Моза.
Хоза-хоза бола Моза
ДIалургбац аз, къаьнашк, хьона…
Эшаш дац хьа ахча тхона.
Эшаш дац хьа даьтта-шекар!..
Цигга баьлар боккха кегар:
Кхераенна Гизг дIауд,
Зунгат цунна тIехьауд!
Ира шалта лира къег,
Гизга тIодаш гарре эг!...
«Тийшаболх, - вай даьша йоах, –
Бодаш ба ше лелочох!»
Ва са да-дай,
Вада-дай!
Белхаш багIа
Нускала дай!
Iоухаш да
БIаргара хий,
Цул дирагIа
Дунен чу дий?
КIувсаш-зипаш,
Даьтта-шекар…
Шедар дайра,
Дайра шедар!
