Кицаш
Саг болатал чIоагIагIа вале а, зизал бочагIа ва.
Иман дар ва ираз дар.
Визза къонах овлияэл лакхагIа лаьрхIав Дала.
Везачоа далар а ийшадац, цавезачох алар а ийшадац.
Гаьнашта лакхе «шорх» латт, гаьнашта лохе тем латт.
Дувцар
«Баге дIакъайла хинна мара...»
- Урокага кийчавар малав?- хаьттад хьехархочо.
Кулг айдеш, йистхулаш саг хиннавац.
- Яни, Iомаяьйий Iа урок? – юха а хаьттад хьехархочо.
- Iомаяьяц, - аьннад кIаьнка.
- ХIана?
- Цамогаш хиннавар со, - бехках кIалхарвала эттав дешархо.
- Фу даьдар хьона?
- Са хьалдоалар са, минот дIаяха мара.
- Мишта дисар из хьал ца доалаш? – тIавийрзав хьехархо.
- Баге дIакъайла хинна мара, хьал-м доалар, - яьхад Яне.